செங்கல்பட்டு: இ.சி.ஆரில் த.வெ.க. ஆண்டு விழா பேனர்கள் கிழிப்பால் பரபரப்பு
செங்கல்பட்டு மாவட்டம், மாமல்லபுரம் கிழக்கு கடற்கரை சாலையில் பூஞ்சேரியில் உள்ள போர் பாயிண்ட் தனியார் நட்சத்திர ஓட்டலில் த. வெ. க. கட்சியின் 2-ம் ஆண்டு துவக்க விழா நாளை (புதன்) நடக்கிறது. இவ்விழாவில் 2500 முதல் 3000 பேர் வரை கட்சி நிர்வாகிகள் கலந்து கொள்ள உள்ளதாக கூறப்படுகிறது. ஆண்டு விழாவை முன்னிட்டு கட்சி தலைவர் விஜய்-யை வரவேற்று கிழக்கு கடற்கரை சாலையில் கோவளம் முதல் மாமல்லபுரம் வரையில் பல கிலோ மீட்டர் தூரத்திற்கு அக்கட்சியினர் பிளக்ஸ் பேனர்கள் வைத்துள்ளனர். இந்நிலையில்; மாம்பாக்கம் ஊராட்சி தலைவர் வீரா என்பவர் தனது மனைவி புகைப்படத்துடன் இ. சி. ஆரில் 30-க்கும் மேற்பட்ட இடங்களில் பிளக்ஸ் பேனர்கள் வைத்திருந்தார். இதில் நெம்மேலி, பட்டிபுலம் பகுதியில் வைக்கப்பட்டிருந்த அவரது (ஊராட்சி தலைவர் வீரா) 8 பேனர்களில் மர்ம நபர்கள் சிலர் அவரது மனைவி ஹேமாவின் படத்தை மட்டும் விட்டுவிட்டு, அவரது உருவத்தை பிளேடால் கழித்து சேதப்படுத்தியுள்ளனர். இந்த பேனர் கிழிப்பு சம்பவம் இ. சி. ஆர். சாலையில் பரபரப்பை ஏற்படுத்தியுள்ளது.
