சேலம் இரும்பாலையில் தொழிலாளர்கள் போராட்டம்.. உற்பத்தி பாதிப்பு
சேலம் இரும்பாலையில் உள்ள 3 அலகுகளில் 600 தொழிலாளர்கள் பணியாற்றி வருகின்றனர். இவர்களுக்கு வழங்க வேண்டிய 39 மாத நிலுவைத்தொகையை உடனடியாக வழங்க வேண்டும். 10 ஆண்டுகளுக்கு மேலாக நிலுவையில் உள்ள வீட்டு வாடகைப்படி, ஏற்கனவே நடைமுறையில் இருந்த பணிக்கொடை திட்டம், 2007-ல் இருந்து திருத்தப்படாத ஊக்க ஊதிய திட்டம், பணியிடை மற்றும் பணி மாறுதலுக்கு உட்பட்ட தொழிலாளர்களின் ஆணையினை ரத்து செய்வது, போனஸ் திட்டத்தை மாற்றி அமைப்பது உள்ளிட்ட 14 அம்ச கோரிக்கைகளை வலியுறுத்தி தொழிலாளர்கள் நேற்று(அக்.28) ஒரு நாள் வேலை நிறுத்த போராட்டத்தில் ஈடுபட்டுள்ளனர். இதன் காரணமாக சேலம் இரும்பாலையில் சுமார் 1500 டன் உற்பத்தி பாதிக்கப்பட்டுள்ளது. தொடர்ந்து தொழிலாளர்களின் கோரிக்கைகளை செயில் நிர்வாகம் விரைந்து நிறைவேற்றவில்லை எனில் தொடர் வேலை நிறுத்த போராட்டத்தில் ஈடுபட உள்ளதாக தொழிற்சங்கத்தினர் தெரிவித்துள்ளனர்.
