கோவை நிதி நிறுவனத்தில் பணம் இழந்தவர்கள் புகார் அளிக்கலாம்
கோவை மாநகர பொருளாதார குற்றப்பிரிவு போலீசார் வெளியிட்டுள்ள செய்திக்குறிப்பில், கோவை ராமநாதபுரத்தில் ‘க்ரீன் க்ரெஸ்ட்’ என்ற நிதி நிறுவனம் செயல்பட்டு வந்தது. இந்த நிறுவனத்தில் பலர் முதலீடு செய்து ஏமாந்தனர். இது குறித்து கடந்த 2020ம் ஆண்டு அந்த நிறுவனத்தினர் மீது பொருளாதார குற்றப்பிரிவு போலீசார் வழக்குப்பதிவு செய்தனர். குற்றப்பத்திரிகை தாக்கல் செய்த நிலையில், மீண்டும் புலன் விசாரணை மேற்கொள்ள உத்தரவு பெறப்பட்டு பாதிக்கப்பட்டவர்களிடம் புகார் பெறப்பட்டது. தற்போது அதில் கூடுதல் குற்றப்பத்திரிகை தாக்கல் செய்ய உள்ளதால் இந்த நிறுவனத்தில் முதலீடு செய்து ஏமாந்தவர்கள் கோவை மாநகர போலீஸ் கமிஷனர் அலுவலகத்தில் செயல்பட்டு வரும் பொருளாதார குற்றப்பிரிவு அலுவலகத்தில் தங்களுடைய அசல் ஆவணங்களுடன் நேரில் வந்து புகார் அளிக்கலாம் என பொருளாதார குற்றப்பிரிவு போலீசார் தெரிவித்துள்ளனர்.
