கோவை: அதிக மது அருந்திய இளைஞர் பலி
சிவகங்கை மாவட்டம் காளையார் கோவிலைச் சேர்ந்த 20 வயது இளைஞர் கோபி. கோவை பீளமேடு ராஜீவ் நாயுடு லே-அவுட் பகுதியில் தனது நண்பர்களுடன் தங்கி கூலி வேலை செய்து வந்தார். அவருக்கு சிவகங்கையைச் சேர்ந்த திருமணமான பெண்ணுடன் கள்ளக்காதல் ஏற்பட்டது. இதனால், அந்தப் பெண்ணை கோவைக்கு அழைத்து வந்து ஒன்றாக வசித்து வந்தார். இந்நிலையில், அந்தப் பெண்ணின் கணவர் அளித்த புகாரின் பேரில் சிவகங்கை டவுன் போலீசார் கோவை வந்து கோபி மற்றும் அந்தப் பெண்ணை சிவகங்கைக்கு அழைத்துச் சென்றனர். ஆனால், அப்பெண் தனது கணவருடன் செல்ல மறுத்து தாயாருடன் சென்றுவிட்டார். இதனால் மனமுடைந்த கோபி, அளவுக்கு அதிகமாக மது அருந்திவிட்டு பீளமேடு ரயில்வே தண்டவாளப் பகுதியில் நடந்து சென்றபோது நிலைதடுமாறி கீழே விழுந்து படுகாயமடைந்தார். அவரது நண்பர்கள் அவரை மீட்டு அறைக்கு அழைத்துச் சென்றனர். ஆனால், மறுநாள் காலை பார்த்தபோது கோபி அசைவின்றி இறந்து கிடந்தார். உடனடியாக கோபியை மீட்டு இ.எஸ்.ஐ மருத்துவமனைக்குக் கொண்டு சென்றனர். அங்கு அவரை பரிசோதித்த மருத்துவர்கள், கோபி ஏற்கனவே இறந்துவிட்டதாக கூறினர். இந்த சம்பவம் குறித்து பீளமேடு போலீசார் நேற்று வழக்கு பதிவு செய்து விசாரணை நடத்தி வருகின்றனர்.
