கொங்கணாபுரம் அருகே வீட்டின் பூட்டை உடைத்து 17 பவுன் திருட்டு
சேலம் மாவட்டம் கொங்கணாபுரம் ஒன்றியம், குரும்பப்பட்டி ஊராட்சி, வெண்டனூர் பகுதியை சேர்ந்தவர் கார்த்திகேயன் (வயது 30). இவருடைய மனைவி பாக்கியம். இவர்களுக்கு கவுசி என்ற 3 வயது ஆண் குழந்தை உள்ளது. கார்த்திகேயன், வெண்டனூர் அருகே உள்ள வாழக்குட்டை ரோடு பகுதியில் உள்ள தனது வீட்டில் குடும்பத்துடன் வசித்து வருகிறார். ஈரோடு அக்ரஹாரம் பகுதியில் உள்ள தனியார் தொழிற்சாலையில் மேற்பார்வையாளராக பணிபுரிந்து வரும் கார்த்திகேயன் வாரம் ஒரு முறை மட்டும் வீட்டிற்கு வந்து செல்வது வழக்கம். இந்த நிலையில் வீட்டில் பாக்கியம் தனது மகனுடன் தனியாக வசித்து வந்தார். நேற்று(அக்.17) பாக்கியம் தனது மகனை அழைத்து வர அருகில் உள்ள அங்கன்வாடி மையத்திற்கு சென்று இருந்தார். பின்னர் அவர் வீடு திரும்பி வந்த போது வீட்டின் பூட்டு உடைக்கப்பட்டு இருந்ததை கண்டு அதிர்ச்சி அடைந்தார். உடனே பாக்கியம், வீட்டுக்குள் சென்று பார்த்த போது பீரோவில் இருந்த 17 பவுன் தங்க நகைகளையும் மர்ம நபர்கள் திருடிச்சென்று இருப்பது தெரியவந்தது. இது குறித்து அவர் கொடுத்த புகாரின் பேரில் கொங்கணாபுரம் போலீசார் வழக்குப்பதிவு செய்து விசாரித்து வருகின்றனர்.
