கோவை: வெள்ளிங்கிரி மலை மீது தமிழக வெற்றி கழக கொடி
கோவையின் மேற்குத் தொடர்ச்சி மலையில் அமைந்துள்ள வெள்ளியங்கிரிக்கு பாதயாத்திரை செல்ல பக்தர்களுக்கு இந்த மாதம் முதல் அனுமதி அளிக்கப்பட்டுள்ளது. இந்நிலையில், வெள்ளியங்கிரி 7-வது மலை உச்சியில், பக்தர்கள் நடந்து செல்லும் பாதையில் இருந்து சற்று விலகி, உயரமான மூங்கில் கம்பில் தவெக கொடி பறக்க விடப்பட்டிருந்தது. சுமார் 3 மணி நேரம் நடைபயணம் செய்து அடையக்கூடிய ஆன்மிகத் தலத்திலும், வனத்துறையினர் கட்டுப்பாடு அதிகம் உள்ள மலைப் பகுதியிலும் கட்சிக் கொடி பறந்ததால் பக்தர்கள் அதிர்ச்சி அடைந்தனர். தகவல் அறிந்த போளுவாம்பட்டி வனச்சரகர் சுசீந்தரநாத், வன அலுவலர்களை அனுப்பி கட்சிக் கொடியை நேற்று அகற்றினார். இது குறித்து மாவட்ட வன அலுவலர் ஜெயராஜ் கூறுகையில், 7-வது மலையில் கட்டப்பட்டிருந்த கொடி அகற்றப்பட்டது. இதைச் செய்த விஷமிகள் இன்னும் அடையாளம் காணப்படவில்லை. தொடர்ந்து விசாரணை நடந்து வருகிறது. உரிய நடவடிக்கை எடுக்கப்படும் என்றார்.
