கோவை: போதை மாத்திரை விற்பனை செய்த மூவர் கைது!

கோவை மாநகரில் போதை பொருட்கள் விற்பனையை தடுக்க போலீசார் தீவிர நடவடிக்கை எடுத்து வருகின்றனர். இந்நிலையில், காந்திநகர் பகுதியில் போதை மாத்திரைகள் விற்பனை செய்யப்படுவதாக ரகசிய தகவல் கிடைத்தது. இதையடுத்து போலீசார் நேற்று அங்கு சோதனை நடத்தினர். அப்போது சந்தேகநிலையில் நின்று இருந்த 3 பேரை பிடித்து விசாரித்தனர். அதில் அவர்கள் ராமநாதபுரத்தைச் சேர்ந்த சியாம்மெட்ரிக், சதீஷ்குமார், தினகரன் என்பதும், போதை மாத்திரைகளை விற்பனை செய்ததும் தெரியவந்தது. 

இதையடுத்து 3 பேரையும் போலீசார் கைது செய்தனர். அவர்களிடம் இருந்து 318 போதை மாத்திரைகள் மற்றும் ரூ.10,500 ஆகியவற்றை பறிமுதல் செய்தனர். கைதான 3 பேரும் ஆன்லைன் மூலம் போதை மாத்திரைகள் ஆர்டர் செய்து, மும்பையில் இருந்து வாங்கி கோவைக்கு கூரியர் மூலம் வரவழைத்து, கல்லூரி மற்றும் பள்ளி மாணவர்களைக் குறிவைத்து விற்பனை செய்தது தெரியவந்தது. ஒரு மாத்திரை ரூ.30 முதல் 50 ரூபாய்க்கு வாங்கி ரூபாய் 500 வரை விற்பனை செய்து உள்ளனர். தற்போது கூரியர் மூலம் போதை மாத்திரைகள் ஆர்டர் செய்து பெறுவது அதிகரித்து வருகிறது. எனவே அதனைத் தடுக்க காவல்துறையினர் தீவிர நடவடிக்கைகள் மேற்கொண்டு வருவதாக தகவல் தெரிவித்தனர்.