எடப்பாடி அருகே விவசாயி வீட்டில் கொள்ளையடித்த நபர் கைது
சேலம் மாவட்டம், எடப்பாடி அருகே குண்டுமலைகாடு பகுதியை சேர்ந்த விவசாயி பழனியப்பன் (வயது 45). இவர், கடந்த 13-ந் தேதி தோட்ட வேலைக்காக தனது குடும்பத்தினருடன் வீட்டை பூட்டி விட்டு தோட்டத்திற்கு சென்றார். அவர் வேலை முடிந்து மாலையில் வீடு திரும்பிய போது வீட்டின் கதவில் இருந்த பூட்டு உடைக்கப்பட்டு பீரோவில் இருந்த 2 பவுன் தங்க நகைகள், ரூ. 1½ லட்சம் கொள்ளையடிக்கப்பட்டு இருந்தது. இதைக்கண்டு அதிர்ச்சி அடைந்த பழனியப்பன், பூலாம்பட்டி போலீசில் புகார் செய்தார். புகாரின் பேரில் போலீசார் வழக்குப்பதிவு செய்து விசாரணை நடத்தினர். போலீசார் வீட்டில் இருந்த தடயங்களை பதிவு செய்ததில், கொள்ளை நடந்த வீட்டில் கீசெயின் ஒன்றை கைப்பற்றி விசாரணை நடத்தி வந்தனர். இதற்கிடையே கொள்ளை நடந்த வீட்டில் மர்மநபர் கால் பட்டு பெயிண்ட் டப்பாவில் இருந்த பெயிண்ட் கீழே கொட்டியது. கொள்ளையில் ஈடுபட்ட நபர், பெயிண்ட் பட்ட காலுடன் வீட்டில் இருந்து வெளியேறி தனது வீட்டுக்கு சென்றுள்ளார். மழைநேரம் என்பதால் அந்த கால் தடம் சிமெண்டு சாலையில் சுவடுகளாக பதிவாகி இருந்தது. அதே தெருவில் முருகன் (21) என்பவரது வீடு வரை கால்தடம் இருந்தது. அதை பின்தொடர்ந்து சென்ற போலீசார் அவரை கைது செய்தனர்.
