கோவை: பட்டாசை பார்த்து வெடிக்கணும் - தீயணைப்புத்துறை அலர்ட்
தீபாவளிக்கு இன்னும் 4 நாட்களே உள்ளது. இதையடுத்து, கோவை தீயணைப்பு துறையினர் தீ விபத்தில்லா தீபாவளியை கொண்டாட பொது மக்கள், மாணவர்களிடையே விழிப்புணர்வு ஏற்படுத்தி வருகின்றனர். கோவை தீயணைப்பு நிலைய அலுவலர் மணிகண்டன் இது குறித்து இன்று கூறியிருப்பதாவது, பட்டாசு பொருட்கள் வைக்கப்பட்டிருக்கும் அட்டை பெட்டிகளின் மீது, பாதுகாப்பு விதிமுறைகள் மற்றும் முன்னெச்சரிக்கைகளை, கவனமாக படித்துப் பின்பற்ற வேண்டும். பட்டாசு வெடிக்கும் போது பாதுகாப்புக்கு தண்ணீர், மணல் வாளிகளை அருகில் வைக்க வேண்டும். கம்பி மத்தாப்பு, சங்குசக்கரம் வெடித்த பின் தண்ணீரில் நனைத்தோ அல்லது உலர்ந்த மணலில் மூடி வைக்க வேண்டும். வீட்டின் அருகிலோ அல்லது சுற்றுப்புறத்திலோ பட்டாசு வெடிக்கும் போது வீட்டு ஜன்னல், கதவுகளை மூடி வைக்க வேண்டும். குழந்தைகள், பெற்றோர்களின் முன்னிலையில் பட்டாசு வெடிக்க வேண்டும். திறந்த வெளி மைதானத்தில் வெடிப்பது நல்லது. குடிசைப் பகுதியில் ராக்கெட் மற்றும் வெடி பொருட்களை உபயோகிக்கக் கூடாது. கம்பி மத்தாப்பு மற்றும் புஸ்வாணத்தை பாதுகாப்பான துாரத்தில் வைத்து கொளுத்த வேண்டும். வாணவெடிகளை தவிர்க்கவும். அவசர உதவிக்கும், ஆலோசனைக்கும் தீயணைப்பு - மீட்பு துறையினரை அணுகலாம் என்று கூறியுள்ளார்.
