திருப்போரூர் கந்தசாமி கோயிலில் திருக்கல்யாண உற்சவம்
திருப்போரூர் நகரில் அமைந்துள்ள அருள்மிகு ஶ்ரீ கந்தசுவாமி கோயிலில் திருக்கல்யாண உற்சவத்தில் முருகப்பெருமான், தெய்வானை திருமணம் நடைபெற்றது. இதில், ஏராளமான பக்தர்கள் பங்கேற்று சுவாமி தரிசனம் செய்தனர். செங்கல்பட்டு மாவட்டம், திருப்போரூர் நகரில் அமைந்துள்ள அருள்மிகு ஶ்ரீ கந்தசுவாமி கோயிலில் கடந்த 2 ஆம் தேதி கொடியேற்றத்துடன் கந்தசஷ்டி விழா தொடங்கியது. இதையடுத்து, நாள் தோறும் பல்வேறு மலர் அலங்காரத்தில் வள்ளி, தெய்வானையுடன் முருகப்பெருமான் எழுந்தருளி பக்தர்களுக்கு அருள்பாலித்தார். மேலும், முக்கிய வீதிகளில் வீதியுலாவும் நடைபெற்றது. இந்நிலையில், கந்தசஷ்டியின் நிறைவு உற்சவமாக கருதப்படும் திருக்கல்யாண உற்சவம் நடைபெற்றது. இதில், வள்ளி, தெய்வயானையுடன் முருகப்பெருமான் உற்சவ மண்டபத்தில் எழுந்தருளி பக்தர்களுக்கு அருள்பாலித்தார். இதில், அர்ச்கர்களின் வேதங்கள் முழங்க சிறப்பு வாத்தியங்களுடன் தெய்வயானை, முருகப்பெருமான் திருக்கல்யாணம் நடைபெற்றது. பின்னர், தம்பதி சமேதராய் முருகப்பெருமான் தங்கமயில் வாகனத்தில் எழுந்தருளி பக்தர்களுக்கு அருள்பாலித்தார். மேலும், முக்கிய வீதிகளில் சுவாமி வீதியுலாவும் நடைபெற்றது. இதில், திருப்போரூர் மட்டுமல்லாது அதன் சுற்றுப்புற பகுதிகளை சேர்ந்த ஏராளமான பொது மக்கள் மற்றும் பக்தர்கள் கலந்துகொண்டு சுவாமி தரிசனம் செய்தனர்.
