திருப்பூர்: பட்டாவை ரத்து செய்ய நடவடிக்கை கலெக்டர் தகவல்
திருப்பூர் தெற்கு தாலுகா கண்டியன்கோவில் கிராமத்தில் 1 ஏக்கர் பரப்பளவு உள்ள நிலம் ஆதிதிராவிடர் நலத்துறையின் மூலம் நிலமெடுப்பு செய்து குறிப்பிட்ட காலத்துக்குள் வீடு கட்டிக்கொள்ள இலவச வீட்டுமனைப்பட்டா வழங்கப்பட்டது. தமிழ்நிலம் மென்பொருள் இலவச வீட்டுமனைப்பட்டா பெற்ற பயனாளிகளை இணையவழி பதிவேற்றம் செய்யும் பணி நடைபெற்று வருகிறது. இதனால் இலவச வீட்டுமனைப்பட்டா பெற்ற பயனாளிகளை இனம் கண்டறிய இயலாத நிலை ஏற்பட்டால் அந்த பட்டாவை ரத்து செய்ய நடவடிக்கை எடுக்கப்பட உள்ளது. அதன்படி 20 பேர் அடையாளம் காணப்படவில்லை. இவர்கள் பட்டா பெற்று சம்பந்தப்பட்ட இடத்தில் வசிக்கவில்லை. அவர்களை தொடர்புகொள்ளவும் முடியவில்லை. அதனால் பட்டாவில் உள்ள நிபந்தனையின்படி, குறிப்பிட்ட காலத்துக்குள் வீடு கட்டிக்குடியேறாததால் அவர்களின் பட்டாவை ரத்து செய்ய நடவடிக்கை எடுக்கப்படுகிறது. சம்பந்தப்பட்டவர்கள் 15 நாட்களுக்குள் கலெக்டர் அல்லது மாவட்ட ஆதிதிராவிடர் நலத்துறை அதிகாரியை தொடர்புகொள்ளலாம். தவறும்பட்சத்தில் 20 பேரின் பட்டா ரத்து செய்யப்படும் என கலெக்டர் கிறிஸ்துராஜ் தெரிவித்துள்ளார்.
