பரனூரில் சாலை விபத்தில் வாலிபர் பலி; நண்பர் படுகாயம்
செங்கல்பட்டு மாவட்டம் மதுராந்தகம் அடுத்த படாளம் பகுதியை சேர்ந்தவர் சங்கர், 24. மகேந்திரா சிட்டியில் உள்ள தனியார் நிறுவனத்தில் வேலை பார்த்து வந்தார். வேலை முடிந்து தனது 'ஹீரோ ஹோண்டா ஸ்பிளேண்டர்' இருசக்கர வாகனத்தில் கருங்குழி பகுதியை சேர்ந்த சோமசுந்தரம், 19 என்பவருடன் படாளம் நோக்கி ஜி.எஸ்.டி சாலையில் சென்று கொண்டிருந்தார். அப்போது பரனூர் ரயில்வே மேம்பாலம் மீது சென்ற போது பின்னால் வந்த கண்டைனர் லாரி சங்கர் சென்ற இருசக்கர வாகனம் மீது மோதியது. இதில் படுகாயம் அடைந்த சங்கர் சம்பவ இடத்திலேயே பரிதாபமாக உயிரிழந்தார். படுகாயமடைந்த சோமசுந்தரத்தை அங்கிருந்தோர் மீட்டு செங்கல்பட்டு அரசு மருத்துவமனையில் சிகிச்சைக்காக சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. தகவலறிந்து சம்பவ இடத்திற்கு வந்த செங்கல்பட்டு தாலுகா போலீசார் சங்கர் உடலை மீட்டு பிரேத பரிசோதனைக்காக செங்கல்பட்டு அரசு மருத்துவமனைக்கு அனுப்பி வைத்தனர். இச்சம்பவம் குறித்து வழக்கு பதிந்து விசாரணை நடத்தி வருகின்றனர்.
