மினிசரக்கு லாரியில் பேட்டரி திருடிய இருவர் கைது
தர்மபுரி மாவட்டம் பாலக்கோடு அருகே உள்ள கோட்டை தெருவை சேர்ந்தவர் இம்ரான்கான். இவர் மினி லாரியில், பழங்கள் வைத்து பல்வேறு பகுதிகளுக்கு சென்று வியாபாரம் செய்து வருகிறார். இந்நிலையில் நேற்று செப்டம்பர் 26 மாலை இம்ரான்கானுக்கு சொந்தமான பழ மண்டியில் மினி சரக்கு லாரியை நிறுத்தினார். அப்போது, 2 வாலிபர்கள் வாகனத்தின் பேட்டரியை திருடிக் கொண்டிருந்தனர். இதை பார்த்த அவர் கூச்சலிட்டார். அக்கம் பக்கத்தில் உள்ளவர்கள் ஓடிவந்தனர். இதைப்பார்த்த 2 வாலிபர்கள் தப்பியோடினர். அவர்களை துரத்தி சென்று மடக்கி பிடித்து பாலக்கோடு காவல் நிலையத்தில் ஒப்படைத்தனர். காவலர்கள் நடத்திய விசாரணையில், அவர்கள் பாலக்கோடு கணபதிகொட்டாய் பகுதியை சேர்ந்த சக்திவேல், பாரதியார் நகர் தீனதயாளன் என்பதும் தெரியவந்தது. இதையடுத்து பாலக்கோடு காவல்துறையினர் வழக்கு பதிவு செய்து, இருவரையும் கைது செய்தனர். அவர்களிடம் இருந்த பேட்டரியை காவலர்கள் பறிமுதல் செய்தனர்.
