திருப்பூர்: சாலையில் ஓடும் வெள்ள நீர் - வாலிபர் விழுந்து பலி
திருப்பூர் மாவட்டம் பல்லடம் சுற்றுவட்டார பகுதிகளில் இன்று காலை முதலே வானம் மேகமூட்டத்துடன் காணப்பட்ட நிலையில் பிற்பகல் கடுமையான வெயில் காரணமாக வெப்பம் அதிகரித்து காணப்பட்டது. இந்நிலையில் இரவு நேரத்தில் 8 மணி முதல் கனமழை பெய்து வருகிறது. சுமார் ஒரு மணி நேரத்திற்கு மேலாக பல்லடம், மற்றும் அதன் சுற்றுவட்டார பகுதிகளான வடுகபாளையம், கேத்தனூர், சித்தம்பலம், வாவிபாளையம், பொங்கலூர், மாதப்பூர், கொடுவாய் ஆகிய பகுதிகளில் கடும் இடி மின்னலுடன் சுமார் 2 மணி நேரத்திற்கும் மேலாக கனமழை பெய்து வந்தது. இந்நிலையில் பல்லடம் செட்டிபாளையம் சாலையில் மின் நகர் பகுதியில் பைக்கில் சென்று கொண்டிருந்த வாலிபர் ஒருவர் சாலையில் பெருக்கெடுத்து ஓடிய மழை நீரில் நிலை தடுமாறி கீழே விழுந்ததில் சம்பவ இடத்திலேயே பரிதாபமாக உயிரிழந்தார். அவரது இரு சக்கர வாகனத்திற்கு பின்னால் வந்த மேலும் இரண்டு இரு சக்கர வாகன ஓட்டிகள் விபத்து ஏற்பட்ட இருசக்கர வாகனத்தின் மீது மோதி கீழே விழுந்து விபத்துக்குள்ளானது. இவற்றில் உயிரிழந்த வாலிபர் யார் என்பது குறித்து போலீசார் தற்பொழுது விசாரணை மேற்கொண்டு வருகின்றனர். மேலும் கனமழை பெய்து வருவதால் வாகன ஓட்டிகள் வாகனங்களை இயக்க கடும் அவதிக்குள்ளாகியுள்ளனர்.
