சேலம்: ஏரிக்கரையில் நாயை கொன்று மரத்தில் தொங்க விட்ட கொடூரம்
சேலம் மாவட்டம் இடங்கணசாலை நகராட்சி சின்ன ஏரிக்கரை பகுதியில் உள்ள உயரமான மரத்தில் நாய் ஒன்று கயிற்றில் கட்டி தூக்கில் தொங்க விடப்பட்டு இருந்தது. இந்த காட்சியை சிலர் வீடியோ எடுத்து சமூக வலைத்தளங்களில் பரவ விட்டனர். இதனால் அந்த பகுதியில் பரபரப்பு ஏற்பட்டது. இதனை அறிந்த நகராட்சி பணியாளர்கள் அங்கு சென்று தூக்கில் தொங்கிக்கொண்டிருந்த நாயின் உடலை மீட்டு அந்த பகுதியிலேயே குழி தோண்டி புதைத்தனர். இதுதொடர்பாக நகராட்சி நிர்வாகம் விசாரணை நடத்தியபோது, ஏரிக்கரை பகுதியில் ஏராளமான நாய்கள் சுற்றித் திரிகின்றன. இந்த நாய்கள் அந்த பகுதியில் உள்ளவர்களை கடித்து இருக்கலாம் எனவும், அதனால் ஆத்திரம் அடைந்து சிலர் நாயை கொன்று தூக்கில் தொங்கவிட்டு இருக்கலாம் எனவும் கூறப்படுகிறது. அதேநேரத்தில் ஏரிக்கரை பகுதி என்பதால் மது அருந்தி ஏராளமானவர்கள் வந்து செல்கின்றனர். அப்படி மது அருந்தி வந்தவர்களது 'சைடிசை' நாய் தின்று இருக்கலாம் எனவும், இதில் ஆத்திரம் அடைந்த மதுபிரியர்கள் நாயை கொன்று தூக்கில் தொங்கவிட்டு இருக்கலாம் எனவும் கூறப்படுகிறது. இதுதொடர்பாக நகராட்சி அதிகாரிகள் விசாரித்து வருகின்றனர். இருந்தாலும் நாயை கொன்று மரத்தில் தொங்கவிட்ட சம்பவம் அந்த பகுதியில் பரபரப்பை ஏற்படுத்தி உள்ளது.
