பெற்றோரை பார்க்க சென்ற மகன் ஜீப் மோதி பலி
சேலம் மாவட்டம் தாரமங்கலம் முத்துகவுண்டன் வளைவு பகுதியை சேர்ந்தவர் கோவிந்தன். இவரது மகன் தனபால் (35). இவர் முத்துகவுண்டன் வளைவில் உள்ள தனது பெற்றோரை பார்த்து விட்டு மோட்டார் சைக்கிளில் தாரமங்கலம்- ஜலகண்டாபுரம் மெயின் ரோட்டில் சென்று கொண்டிருந்தார். அப்போது முன்னால் சென்ற மோட்டார் சைக்கிளை ஓட்டி சென்றவர் திடீரென பிரேக் போட்டதால் அந்த வண்டியின் மீது மோதாமல் இருக்க தனபால் பிரேக் போட்டார். இதில் நிலை தடுமாறி சாலையில் விழுந்தார். அதே நேரத்தில் எதிரே தாரமங்கலம் நோக்கி வந்த ஜீப் தனபால் தலையில் ஏறியதால் தலையில் பலத்த காயம் ஏற்பட்டு ரத்த வெள்ளத்தில் கதறினார். இதனை பார்த்த அந்த வழியாக சென்றவர்கள் தாரமங்கலம் போலீசாருக்கு தகவல் கொடுத்தனர். உடனே அங்கு விரைந்து சென்ற போலீசார் அவரை மீட்டு சேலம் அரசு ஆஸ்பத்திரிக்கு அனுப்பி வைத்தனர். அங்கு அவரை பரிசோதித்த டாக்டர்கள் அவர் ஏற்கனவே இறந்து விட்டதாக கூறினர். இதனை பார்த்த உறவினர்கள் கதறினர். சம்பம் குறித்து தாரமங்கலம் போலீசார் விசாரணை நடத்தி வருகிறார்கள்.
