பெரம்பலூர்: அனைத்துத்துறை அலுவலர்களுடனான ஆய்வுக்கூட்டம்
பெரம்பலூர் மாவட்டத்தில் பல்வேறு அரசுத் துறைகளின் சார்பில் செயல்படுத்தப்படும் திட்டப் பணிகளின் முன்னேற்றம் குறித்து அனைத்துத்துறை அலுவலர்களுடனான ஆய்வுக்கூட்டம், மாற்றுத்திறனாளிகள் நலத்துறை இயக்குநர் / பெரம்பலூர் மாவட்ட கண்காணிப்பு அலுவலர் எம். லக்ஷ்மி, தலைமையில், மாவட்ட ஆட்சித்தலைவர் கிரேஸ் பச்சாவ் முன்னிலையில் (05.11.2024) மாவட்ட ஆட்சியர் அலுவலக கூட்ட அரங்கில் நடைபெற்றது. இக்கூட்டத்தில் பெரம்பலூர் மாவட்டத்தில் ஊரக வளர்ச்சி மற்றும் ஊராட்சித் துறையின் கீழ் செயல்படுத்தப்பட்டு வரும் கலைஞரின் கனவு இல்லத் திட்டம், முதலமைச்சரின் சாலை மேம்பாட்டுத் திட்டம், அனைத்து கிராம அண்ணா மறுமலர்ச்சி திட்டம், குடிநீர் திட்டப் பணிகள் உள்ளிட்ட பல்வேறு திட்டங்களின் முன்னேற்றங்கள் குறித்து கண்காணிப்பு அலுவலர் அவர்கள் விரிவாக ஆய்வு செய்தார். மேலும், வேளாண்மை மற்றும் உழவர் நலத்துறையின் கீழ் செயல்படுத்தப்படும் கலைஞரின் அனைத்து கிராம ஒருங்கிணைந்த வேளாண் வளர்ச்சித் திட்டம், நுண்ணீர் பாசனத் திட்டப் பணிகளின் முன்னேற்ற நிலை குறித்தும், பள்ளிக்கல்வித்துறையின் சார்பில், அரசு பள்ளிகளில் மாணவர்களின் சேர்க்கை விவரம், தேர்ச்சி விகிதம், விலையில்லா மிதிவண்டிகள் வழங்கிய விவரம், சீருடைகள் உள்ளிட்ட பள்ளி உபகரணங்கள் மாணவர்களுக்கு வழங்கப்பட்டுள்ளதை விரிவாக ஆய்வு செய்தார்.
