அரூர்: நாட்டு துப்பாக்கியுடன் வேட்டையாட வந்தவர் கைது
தர்மபுரி வனக்கோட்டம் அரூர் சட்டமன்ற தொகுதி மொரப்பூர் வனச்சரகம் வாதாப்பட்டி பிரிவு செல்லம் பட்டி பன்னி மடுவு சராகத்தில் வனவர் சாக்கப்பன் மற்றும் வனக்காப்பாளர் ரமேஷ்குமார் ஆகியோர் கடந்த புதன்கிழமை ரோந்து பணி சென்றனர். இரவு 11.50 மணியளவில் பொய்யப்பட்டியில் இருந்து அனுமந்தீர்த்தம் செல்லும் வனப்பகுதி ஒட்டியுள்ள சாலையில் நாட்டு துப்பாக்கியுடன் 2 பேர் டுவீலரில் வந்தனர். அவர்களை வனத்துறையினர் பிடிக்க முயன்றனர். ஆனால் தப்பியோடி விட்டனர். விசாரணையில் அவர்கள் வேப்பம்பட்டி மாரியப்பன், மற்றும் அவரது தங்கையின் மகனான கைலாசம் மகன் கனிஷ் என்பது தெரியவந்தது. இவர்களுக்கு துப்பாக்கி கொடுத்து அனுப்பியவர், வேப்பம்பட்டியை சேர்ந்த ஜவஹர் மகன் திருமூர்த்தி என்பது தெரியவந்தது. இதையடுத்து மாரியப்பனை இன்று கைது செய்த வனத்துறையினர், மாவட்ட வன அலுவலர் ராஜாங்கம் முன்பாக ஆஜர்படுத்தி சிறையில் அடைத்தனர். தப்பியோடிய கனிஷ், துப்பாக்கி கொடுத்த திருமூர்த்தி ஆகிய 2 பேரை தேடி வருகின்றனர்.
