பைக் டாக்சி: இளைஞர் மீது தாக்குதல்
கோவை குறிச்சி அழகு நகர் ரோஸ் கார்டன் பகுதியைச் சேர்ந்தவர் அப்துல் வாசர். இவரது மகன் பிலால் (26). இவர், காபி கடை நடத்தி வருகிறார். நேற்று முன்தினம் (செப்.,24) பிலால் தனது மனைவி,கடையில் வேலை செய்யும் ஊழியர்கள் பவித்ரா, ராகுல் ஆகியோருடன் பைக்கில் போத்தனூர் ரயில் நிலையத்துக்கு சென்றார். அப்போது, அங்கு ரயில் நிலையத்தில் ஆட்டோ ஓட்டி வரும் அமானுல்லா (51) என்பவர் அவர்களை மறித்தார். நீங்கள் பைக் டாக்சி ஓட்டுகிறீர்களா? , இங்கு வாடிக்கையாளர்களை அழைத்து செல்ல அனுமதியில்லை எனக்கூறி வாக்குவாதம் செய்தார். உங்களால் தான் எங்களுக்கு வேலை இல்லாமல் போய்விட்டது என தகராறு செய்ததாக கூறப்படுகிறது. அதற்கு அவர்கள் மறுத்துள்ளனர். அப்போது, ஏற்பட்ட பிரச்சனையில் அமானுல்லா, அவருடன் இருந்தவர்கள் பிலால், அவரது மனைவியை தாக்கினர். இதில் காயமடைந்த பிலால் போத்தனூர் போலீசில் புகார் செய்தார். அதன் பேரில் இன்ஸ்பெக்டர் வேல்முருகன் வழக்கு பதிவு செய்து அமானுல்லாவை கைது செய்தார். மேலும் 3 பேரிடம் விசாரணை நடத்தி வருகின்றனர்.
