திருச்செங்கோடு: விவசாயியை வெட்டிக் கொன்ற மகன் கைது
திருச்செங்கோட்டை அடுத்த மொளசி, வெள்ளியம்பாளையம் பகுதியைச் சோ்ந்தவா் இளையப்பன் (70). விவசாயி. இவருக்கு ஜெகநாதன் (49), தாமோதரன் (47) என்கிற மகன்களும் ஒரு மகளும் உள்ளனா். இவருக்கு சொந்தமான இரண்டரை நிலம் உள்ளது. மூத்த மகன் ஜெகநாதன் கடந்த ஏழு ஆண்டுகளுக்கு முன் இறந்து விட்ட நிலையில் அவரது மனைவி, மகன் உள்ளனா். இரண்டாவது மகன் தாமோதரனின் முதல் மனைவி கோபித்துக் கொண்டு சென்ற நிலையில் இரண்டாவது மனைவி சந்தியா என்பவருடன் வாழ்ந்து வருகிறாா். முதல் மனைவிக்கு இரண்டு பெண் குழந்தைகளும் இரண்டாவது மனைவிக்கு இரண்டு பெண் குழந்தைகளும் என நாலு பெண் குழந்தைகள் உள்ளனா். இந்த நிலையில் தந்தை இளையப்பனுடன் மதுபோதையில் தாமோதரன் தகராறு செய்து வந்துள்ளாா். இந்த நிலையில் வியாழக்கிழமை இரவு சொத்து சம்பந்தமாக இளையப்பன், தாமோதரன் இடையே தகராறு ஏற்பட்டுள்ளது. தாமோதரன் தனக்குச் சொத்தை எழுதி வைக்காத ஆத்திரத்தில் தந்தை இளையப்பனை அரிவாளால் வெட்டினாா். இதில் படுகாயம் அடைந்த அவா் உயிரிழந்தாா். இந்தச் சம்பவம் குறித்து தகவலறிந்த மொளசி போலீஸாா் விரைந்து சென்று இளையப்பனின் உடலை மீட்டு பிரேதப் பரிசோதனைக்காக நாமக்கல் அரசு மருத்துவமனைக்கு அனுப்பி வைத்தனா்.
