சேலம் அருகே லாரி டிரைவர் குத்தி கொலை 3 பேர் கைது
சேலம் மாவட்டம் பனமரத்துப்பட்டி அருகே உள்ள தும்பல்பட்டி கிராமம் இரட்டைப்புலிப்புதூர் பகுதியை சேர்ந்தவர் கனகராஜ் லாரி டிரைவர். இவருடைய மனைவி சத்யபிரியா. இவர்களுக்கு 2 மகன்கள் உள்ளனர். 12 வயதான மூத்த மகன் நாமக்கல் மாவட்டம் ராசிபுரம் அருகே உள்ள ஆயில்பட்டி பகுதியில் ஒரு தனியார் பள்ளியில் 7-ம் வகுப்பு படித்து வருகிறான். இதே போல் கம்மாளப்பட்டி அருகே உள்ள எட்டிக்குட்டை பகுதியை சேர்ந்தவர் முத்து (27), விவசாயி. இவருடைய 5 வயது மகனும் ஆயில்பட்டியில் உள்ள அதே தனியார் பள்ளியில் எல். கே. ஜி. படித்து வருகிறான். இந்த நிலையில் இருவரும் பள்ளிக்கு ஒரே வேனில் சென்று வந்துள்ளனர். சம்பவத்தன்று எல். கே. ஜி. மாணவனை 7-ம் வகுப்பு மாணவன் தவறாக பேசியதாக கூறப்படுகிறது. இதுதொடர்பாக அவர்களுக்குள் தகராறு ஏற்பட்டுள்ளது. இதில் ஆத்திரம் அடைந்த முத்து தனது உறவினர்களான வினோத் (வயது 27), குணா (35) மற்றும் சிலருடன் லாரி டிரைவர் கனகராஜ் வீட்டிற்கு சென்று தகராறாரில் ஈடுபட்டனர். இதில் ஆத்திரம் அடைந்த அவர்கள் கத்தியால் லாரி டிரைவர் கனகராஜை குத்தி விட்டு தப்பி சென்றனர். பலத்த காயம் அடைந்த கனகராஜ் ரத்த வெள்ளத்தில் விழுந்து பரிதாபமாக இறந்தார். இதையடுத்து போலீசார் கனகராஜின் உடலை மீட்டு பிரேத பரிசோதனைக்காக அனுப்பி வைத்தனர். இந்த கொலை தொடர்பாக போலீசார் வழக்குப்பதிவு செய்து முத்து, வினோத், குணா ஆகியோரை கைது செய்தனர்.
