கரூர்: அரசு மணல் குவாரிகளை திறக்கக் கோரி காத்திருப்பு போராட்டம்
அரசு மணல் குவாரிகளை உடனடியாக திறக்க வலியுறுத்தி, தமிழ்நாடு அனைத்து மணல் லாரி உரிமையாளர்கள், ஓட்டுநர்கள் மற்றும் மாட்டுவண்டி உரிமையாளர்கள் சார்பில் காத்திருப்பு போராட்டம் நடைபெற்றது. தமிழகம் முழுவதும் கடந்த 12.09.23 முதல் அரசு மணல் குவாரிகளில் நடைபெற்ற முறைகேடுகள் தொடர்பாக அமலாக்கத்துறை சோதனையால் மணல் குவாரிகள் மூடப்பட்டன. இதனால் மணல் லாரி உரிமையாளர்கள் நிதி நிறுவனங்களில் வாங்கிய கடனை செலுத்த முடியாத காரணத்தினால் நிதி நிறுவனங்கள் லாரிகளை பறிமுதல் செய்கின்ற அவலநிலை ஏற்பட்டது. அதேபோல் மாட்டுவண்டி உரிமையாளர்களுக்கு மாடுகளுக்கு கூட தீவனம் வைக்க முடியாமல் மாடுகள் பட்டினியால் வாடி வருகின்றன. அதனால் தமிழக அரசு 25.01.25 அறிவித்ததுபடி புதிதாக 13 மணல் குவாரிகளை போர்க்கால அடிப்படையில் திறக்க வேண்டும். எங்கள் வாழ்வாதாரத்தை காத்திட வேண்டும் என வலியுறுத்தி தமிழ்நாடு முதல்வர் கவனத்தை ஈர்க்கும் வகையில் கரூர் மாவட்டம் மாயனூரில் காத்திருப்பு போராட்டம் நடத்தி வருகிறோம் என போராட்டம் நடத்தி வரும் மணல் லாரி உரிமையாளர்கள் மற்றும் மாட்டுவண்டி உரிமையாளர்கள் தெரிவித்தனர்.
