தலைமறைவு குற்றவாளி புதுச்சேரியில் கைது
செங்கல்பட்டு மாவட்டம் மறைமலை நகர் என். ஹெச். , 2 பகுதியை சேர்ந்த தொழிலதிபர் திருமாறன்,(வயது 50). கடந்த 2021ம் ஆண்டு, தனது வீட்டின் அருகே உள்ள முருகன் கோவிலுக்கு சென்றபோது, வெடிகுண்டு வீசி படுகொலை செய்யப்பட்டார். இந்த வழக்கில் தொடர்புடைய மணிமங்கலம் பகுதியை சேர்ந்த ராஜேஷ், (வயது 49), திருச்சி நீதிமன்றத்தில் சரணடைந்து, பின் நிபந்தனை ஜாமினில் வெளிவந்து தலைமறைவானார். பல மாதங்களாக தலைமறைவாக உள்ள முக்கிய குற்றவாளிகளை பிடிக்க, தாம்பரம் போலீஸ் கமிஷ்னர், மறைமலை நகர் போலீசாருக்கு உத்தரவிட்டதையடுத்து, போலீசார் ராஜேஷை பல்வேறு இடங்களில் தேடினர். இந்நிலையில், ராஜேஷ் கோயம்புத்துார் பகுதியில் தலைமறைவாக இருப்பது தெரியவந்தது. மறைமலை நகர் காவல் நிலைய சட்டம் -- ஒழுங்கு இன்ஸ்பெக்டர் தலைமையில் சென்ற போலீசார், பல்வேறு இடங்களில் தேடி வந்தனர். இறுதியாக, புதுச்சேரியில் பதுங்கி இருந்த ராஜேஷை, நேற்று கைது செய்து காவல் நிலையம் அழைத்து வந்து விசாரித்து வருகின்றனர். ராஜேஷ் மீது, எட்டு கொலை மற்றும் இரண்டு கொலை முயற்சி வழக்குகள் நிலுவையில் உள்ளன.
