இரணியல்: செல்போன் வெடித்து தொழிலாளி உயிரிழப்பு
இரணியல் அருகே ஆளூர் பகுதி சேர்ந்தவர் பிரேம்குமார். தற்போது புதிதாக வீடு கட்டி வருகிறார். வீட்டில் பெயிண்ட் வேலைக்கு நாங்குநேரி பகுதியை சேர்ந்த செல்வ சதீஷ் (25) ஏர்வாடி வெங்கடேஷ் (23) ஆகியோர் கடந்த 8-ம் தேதி வந்தனர். இந்த நிலையில் இன்று (நவம்பர் 13) கிரகப்பிரவேச நாளானதால் நேற்று (நவம்பர் 12) வேலையை முடித்து அவர்கள் இரண்டு பேரும் சரல்விளை பகுதியில் உள்ள பிரேம்குமாரின் உறவினர் வீட்டில் இரவு தங்கி உள்ளனர். இன்று (நவம்பர் 13) காலை சுமார் ஆறு மணி அளவில் வெங்கடேஷ் எழும்பி பார்த்தபோது செல்வ சதீஷ் பேச்சு மூச்சு இல்லாமல் கிடந்துள்ளார். உடனே இது தொடர்பாக இரணியல் போலீஸ் நிலையத்தில் தகவல் தெரிவித்தனர். சம்பவ இடத்திற்கு குளச்சல் டிஎஸ்பி மற்றும் போலீசார் விசாரணை நடத்தியதில், செல்வசதீஷ் படுத்திருந்த அறை முழுவதும் தீயில் எரிந்து நாசமாகி கிடந்தது. அதேபோன்று அவரது தலையணை அருகில் வைத்திருந்த செல்போன் வெடித்த நிலையில் கிடந்தது. இதை அடுத்து போலீசார் தடையவியல் துறையினர் சம்பவ இடத்திற்கு வந்து தடயங்களை கைப்பற்றி ஆய்வு செய்தார். தொடர்ந்து செல்வ சதீஷ் உடலை போலீசார் மீட்டு குமரி அரசு மருத்துவ கல்லூரி ஆஸ்பத்திரிக்கு அனுப்பினர். செல்வ சதீஷ் மதுபோதையில் புகை பிடித்து விட்டு சிகரெட் துண்டு படுக்கையில் போட்டதில் இறந்தாரா? அல்லது செல்போன் வெடித்து இருந்தாரா? என போலீசார் விசாரித்து வருகின்றனர்.
