பேராவூரணியில் நாய்கள் தொல்லை.. நடவடிக்கை எடுக்க கோரிக்கை
தஞ்சாவூர் மாவட்டம், பேராவூரணி மற்றும் சுற்று வட்டாரக் கிராமங்களில் தெருநாய்கள் தொல்லை அதிகரித்து வருகிறது. தெருக்களில் கூட்டம் கூட்டமாக சுற்றித்திரியும் நாய்கள் அவ்வழியே செல்வோரை துரத்திச் சென்று அச்சுறுத்துகிறது. குறிப்பாக அண்ணா நகர் பகுதியில் பகல்-இரவு எந்த நேரமும் பொதுமக்கள் நடந்து செல்ல பயமாக உள்ளது. வாகனங்களில் செல்வோர் நாய் துரத்துவதால் அடிக்கடி கீழே விழுந்து காயம் அடைகின்றனர். அவ்வழியாக செல்லும் ஆடு, மாடுகள் உள்ளிட்ட கால்நடைகளையும், வீடுகளில் வளர்க்கப்படும் கோழிகளையும் கடித்து குதறுவதால் கால்நடை வளர்ப்போர் பாதிக்கப்படுகின்றனர். எனவே சம்பந்தப்பட்ட துறை அலுவலர்கள் ஆய்வு செய்து, நாய் தொந்தரவை கட்டுப்படுத்த உரிய நடவடிக்கை எடுக்க வேண்டும். வீடுகளில் நாய் வளர்ப்போர் உரிமம் பெறவும், நாய்களுக்கு தடுப்பூசி போடவும் நடவடிக்கை எடுக்க வேண்டும். பள்ளி மாணவ, மாணவிகள், முதியோர்கள், பெண்கள், வாகன ஓட்டிகளை நாய்களின் அச்சுறுத்தலில் இருந்து பாதுகாக்க நடவடிக்கை எடுக்க வேண்டும் என பொதுமக்கள் வலியுறுத்தி உள்ளனர்.
