ஒரத்தநாடு அருகே ஆற்றில் குளிக்கச் சென்றவர் மாயம்
ஒரத்தநாடு அருகே ஆற்றில் குளிக்க சென்றவர் தடுமாறி ஆற்றில் விழுந்ததால் தீயணைப்புத்துறையினர் தீவிரமாக தேடி வருகின்றனர். தஞ்சாவூர் மாவட்டம் ஒரத்தநாடு அருகே உள்ள உஞ்சிய விடுதி வெள்ளத்தேவன் விடுதி கிராமத்தைச் சேர்ந்தவர் கொடியரசன் (47). இவர், நேற்று முன்தினம் மாலை 4 மணிக்கு ஊரணிபுரம் பெரியாற்று பாலம் அருகே உள்ள கல்லணைக் கால்வாய் வாய்க்காலில் குளிக்கச் சென்ற பொழுது தடுமாறி ஆற்றில் விழுந்துள்ளார். இதைப் பார்த்த அப்பகுதி பொதுமக்கள் திருவோணம் போலீசாருக்கு தகவல் கொடுத்தனர். அதன்பேரில், அங்கு சென்ற போலீசார் மற்றும் தீயணைப்புத் துறையினர் 4 மணி நேரத்திற்கு மேலாக தேடினர். பின்னர், தொடர்ந்து, நேற்று காலை முதல் இரவு 7 மணி வரை கொடியரசனை தீவிரமாக தேடியும் கண்டுபிடிக்க முடியாமல், தீயணைப்பு துறையினர் திரும்பிச் சென்றனர்.
