சேலம்: மாவட்ட போலீஸ் தனி பிரிவு எஸ்எஸ்ஐ, ஏட்டுகள் 29 பேர் இடமாற்றம்
சேலம் மாவட்ட எஸ்பி அலுவலகத்தில் இயங்கி வரும் தனி பிரிவின் கட்டுப்பாட்டில் மாவட்டம் முழுவதும் உள்ள 29 காவல் நிலையங்களிலும் சிறப்பு எஸ்ஐக்கள், ஏட்டுகள் காவலர்கள் நிலையில் உளவு பிரிவு போலீசார் பணியில் உள்ளனர். இவர்கள் அந்தந்த நிலையங்களில் பதியப்படும் வழக்குகளின் உண்மை நிலவரம் மற்றும் சட்டம் ஒழுங்கு பிரச்சனை தொடர்பாக முன்கூட்டியே தகவல்களை மாவட்ட எஸ்பிக்கு நேரடியாக தெரிவிப்பார்கள். இந்த காவலர்களின் பணி என்பது மிகவும் முக்கியமானது. இந்த வகையில் சேலம் மாவட்ட தனி பிரிவில் பணியாற்றி வந்த சிறப்பு எஸ்ஐக்கள், ஏட்டுகள் 29 பேரில் 8 பேரை காத்திருப்பர் பட்டியலில் வைத்துவிட்டு வெவ்வேறு காவல் நிலையங்களில் பணியாற்றி வந்த 8 பேரை தனி பிரிவுக்கு மாற்றி எஸ். பி. கௌதம் கோயல் உத்தரவிட்டுள்ளார். இது தவிர தனி பிரிவிற்குள் 21 பேரை மாற்றியும் உத்தரவிடப்பட்டுள்ளது.
