அரசு மருத்துவமனையில் ஆட்சியரின் பேரனுக்கு சிகிச்சை
அரசு மருத்துவமனையில் சிகிச்சைக்காக சோ்க்கப்பட்ட ஆட்சியரின் பேரன்! உடல்நலம் பாதிக்கப்பட்ட தன்னுடைய பேரனை நாமக்கல் அரசு மருத்துவமனையில் சோ்த்து சிகிச்சை அளித்து வருகிறாா் மாவட்ட ஆட்சியா் ச. உமா. அரசு மருத்துவமனையில் சிகிச்சை பெற அரசியல் பிரமுகா்களும், அதிகாரிகளும் தயங்கும் சூழலில் உடல்நலம் பாதிக்கப்பட்ட தன்னுடைய பேரனை நாமக்கல் அரசு மருத்துவமனையில் சோ்த்து சிகிச்சை அளித்து வருகிறாா். மாவட்ட ஆட்சியா் ச. உமா. மத்திய, மாநில அரசுத் துறைகளில் பணியாற்றும் அதிகாரிகள், அலுவலா்கள், அரசியல் பிரமுகா்கள் பலா் தங்களது குழந்தைகளை பெரும்பாலும் தனியாா் பள்ளிகளில் சோ்க்கவே அதிக ஆா்வம் காட்டுகின்றனா். இதற்காக பல லட்சம் ரூபாய் செலவழிக்கின்றனா். மேலும், உடல்நலம் பாதிக்கப்பட்டால் உடனடியாக அரசு மருத்துவமனைகளை நாடாமல் தனியாா் மருத்துவமனைகளுக்கே இவா்கள் செல்கின்றனா். இந்த நிலையில் மற்றவா்களுக்கு முன்னுதாரணமாக விளங்கும் வகையிலும், தன்னுடைய மகள் வழி பேத்தியை அங்கன்வாடியில் சோ்த்து கல்வி பயில வைக்கும் நாமக்கல் மாவட்ட ஆட்சியா் ச. உமா, அண்மையில் தன்னுடைய 3 மாத பேரன் சளித்தொல்லையால் உடல் நலம் குன்றியபோது, தனியாா் மருத்துவமனையை நாடாமல், அரசு மருத்துவமனையில் சோ்த்து சிகிச்சை அளித்து வருகிறாா். தற்போது குழந்தை உடல் நலம் தேறியுள்ளது.
