மயிலாடுதுறையில் நெகிழி ஒழிப்பு விழிப்புணா்வுப் பேரணி
மயிலாடுதுறையில் கல்லூரி மாணவ- மாணவிகள் பங்கேற்ற நெகிழி ஒழிப்பு விழிப்புணர்வுப் பேரணி நடைபெற்றது. மயிலாடுதுறை மாவட்ட நிர்வாகத்துடன் இணைந்து மயிலாடுதுறை நகராட்சி மற்றும் மாசு கட்டுப்பாட்டு வாரியம் நடத்திய நெகிழி ஒழிப்பு விழிப்புணர்வுப் பேரணி நகராட்சி அலுவலகத்தில் தொடங்கி நடைபெற்றது. மாசு கட்டுப்பாட்டு வாரிய சுற்றுச்சூழல் பொறியாளர் தமிழ்ஒளி பேரணியை கொடியசைத்து தொடக்கி வைத்தார். நகரின் முக்கிய வீதிகளின் வழியாக சென்ற பேரணியில் தருமபுரம் ஞானாம்பிகை அரசினர் மகளிர் கலைக்கல்லூரி, தருமபுரம் ஆதீனம் கலைக்கல்லூரி, சிசிசி சமுதாயக் கல்லூரி உள்ளிட்ட பல்வேறு கல்லூரிகளைச் சேர்ந்த மாணவ, மாணவிகள் சுமார் 200 பேர் பங்கேற்றனர். மீண்டும் நகராட்சி அலுவலகத்தில் பேரணி நிறைவு பெற்றது. நகராட்சி நகர்நல அலுவலர் மருத்துவர் ஆடலரசி, சுகாதார அலுவலர் டேவிட் பாஸ்கர்ராஜ், சுகாதார ஆய்வாளர் தீபன் சக்ரவர்த்தி, சிசிசி சமுதாய கல்லூரி நிறுவனர் ஆர். காமேஷ், தருமபுரம் ஞானாம்பிகை அரசினர் மகளிர் கலைக் கல்லூரி சுற்றுச்சூழல் சங்க ஒருங்கிணைப்பாளர் வனிதா, என்எஸ்எஸ் ஒருங்கிணைப்பாளர்கள் சங்கர்கணேஷ், சித்ரா உள்ளிட்ட பலர் கலந்து கொண்டனர்.
