மார்த்தாண்டம்: ரூ. 1 கோடி மோசடி வாலிபர் கைது
மார்த்தாண்டம் அருகே உண்ணாமலை கடை பகுதியைச் சேர்ந்தவர் கிருஷ்ணன் (47). இவர் முஞ்சிறை பகுதியில் ஒரு தனியார் மேல்நிலைப் பள்ளியில் தலைமை ஆசிரியராக உள்ளார். மஞ்சாலுமூடு பகுதியைச் சேர்ந்த ஷிபு (38) என்பவர் இவருக்கு அறிமுகமாகியுள்ளார். ஷிபு ஒரு தனியார் வங்கியில் வேலை பார்ப்பதாகவும் பல கோடி ரூபாய்களுக்கு லோன் வாங்கித் தர முடியும் என்று கூறியுள்ளார். கிருஷ்ணனுக்கு ஒரு தனியார் பள்ளிக்கூடத்தை வாங்க திட்டமிருந்தது. இதற்கு ஒரு கோடி ரூபாய் தேவைப்பட்டது. அவர் ஷிபுவிடம் இது குறித்துக் கேட்டுள்ளார். அதற்கு ஷிபு லோன் வாங்கிக் கொடுப்பதாக ஒப்புக்கொண்டுள்ளார். அதற்காக கிருஷ்ணன் ஆறு லட்சத்து 78 ஆயிரம் ரூபாய் வரை கொடுத்துள்ளார். பின்னர் ஷிபு கிருஷ்ணனிடம் பேசுவதைத் தவிர்த்துள்ளார். போன் செய்தாலும் எடுப்பதில்லை. இதனால் தான் ஏமாற்றப்பட்டது உணர்ந்த கிருஷ்ணன் மார்த்தாண்டம் போலீசில் புகார் அளித்தார். மார்த்தாண்டம் போலீசார் வழக்குப் பதிவு செய்து விசாரித்தனர். இதில் ஷிபு லோன் வாங்கித் தருவதாகவும் வேலை வாங்கித் தருவதாகப் பலரை ஏமாற்றி சுமார் ஒரு கோடி ரூபாய்க்கும் மேல் மோசடி செய்தது தெரியவந்தது. இதையடுத்து போலீசார் ஷிபுவை நேற்று கைது செய்தனர். அவரிடம் தொடர்ந்து விசாரணை நடந்து வருகிறது.
