மார்த்தாண்டம்: அலுவலகத்தில் சுருண்டு விழுந்த ஊழியர் பலி
தக்கலை அருகே கோழிப்போர் விளை என்ற பகுதியைச் சேர்ந்தவர் பென்சாம் ஸ்டாலின் டேவிட் (41). இவர் மார்த்தாண்டம் பகுதியில் உள்ள ஒரு தனியார் நிதி நிறுவனத்தில் வேலை பார்த்து வந்தார். நேற்று காலை வழக்கம் போல் பணிக்கு அலுவலகத்திற்கு வந்துள்ளார். அலுவலகத்தில் இருக்கும் போது மதியம் திடீரென பென்சாம் ஸ்டாலின் டேவிட்டுக்கு நெஞ்சுவலி ஏற்பட்டுள்ளது. வலியால் துடித்த அவர் சிறிது நேரத்தில் அங்கே சரிந்து விழுந்து மயங்கினார். இதைக் கண்ட சக ஊழியர்கள் உடனே அவரை மீட்டு குழித்துறை அரசு மருத்துவமனைக்குக் கொண்டு சென்றனர். அங்கு அவரைப் பரிசோதித்த டாக்டர்கள் பென்சாம் ஏற்கனவே இறந்து விட்டதாகத் தெரிவித்தனர். இது குறித்து பென்சாம் ஸ்டாலின் டேவிட்டின் உறவினர் பிரேமா (53) என்பவர் மார்த்தாண்டம் போலீசில் புகார் அளித்தார். போலீசார் வழக்குப் பதிவு செய்து விசாரணை நடத்தி வருகின்றனர்.
