வெளிநாட்டுக்கு ஏற்றுமதி செய்வதாக கூறி மோசடி
ஈரோட்டை தலைமையிடமாகக் கொண்ட யூனிட் எக்ஸ்போர்ட், ஈஸ்ட் வேல்யூ அக்ரோ பாஸ்ட் இந்த இரண்டு நிறுவனம் வெட்டிவேர் வெங்காயம் போன்ற உணவுப் பொருட்களை வெளிநாட்டுக்கு ஏற்றுமதி செய்வதாக கூறி செயல்பட்டு வந்துள்ளது. இதில் முதலீடு செய்தால் நிறைய லாபம் சம்பாதிக்கலாம் என கவர்ச்சிகரமான திட்டங்களை இந்த நிறுவனம் அறிவித்தது. ரூ. 1 லட்சம் கொடுத்தால் மாதம் இரண்டு முறை 18 ஆயிரம் அதாவது ரூ. 36, 000 வட்டி பணம் தருவதாக கூறியுள்ளனர். இதுபோல் 5 லட்சம், 25 லட்சம் என 4 வகையான திட்டங்களை அறிவித்து பணம் வசூல் செய்துள்ளனர். இதில் முன்னாள் ராணுவ வீரர்கள், என ஏராளமானோர் முதலீடு செய்துள்ளனர். இது தொடர்பாக முதலில் மாவட்ட குற்றப்பிரிவில் புகார் செய்யப்பட்டது. அதன் பிறகு பொருளாதாரப் குற்ற பிரிவுக்கு வழக்கு மாற்றப்பட்டது. தொடர்ந்து வழக்கு விசாரணையில் உள்ளது. இதில் ஈஸ்ட் வேல்யு நிறுவனத்தின் பங்குதாரர் பிரபு வீடு கணபதி நகரில் உள்ளது. இந்நிலையில் பணம் கட்டி ஏமாந்தவர்கள் வாட்ஸ்-அப் குழுவில் தகவலை பரிமாறி ஈரோட்டுக்கு வர வேண்டும் என்று தகவல் பரிமாறி உள்ளனர். இதனை ஏற்று பல்வேறு மாவட்டங்களில் இருந்து 100-க்கும் மேற்பட்டவர்கள் கணபதி நகரில் குவிந்தனர். இது தொடர்பாக வீரப்பன் சத்திரம் போலீசாருக்கு தகவல்கிடைத்தது. தகவலின் பேரில் போலீசார் சம்பவ இடத்துக்கு வந்து போராட்டத்தில் ஈடுபட முயன்றவர்களிடம் பேச்சுவார்த்தையில் ஈடுபட்டனர்.
