செங்கம் - Chengam

திருவண்ணாமலை மாவட்டம், போளூர் அருகே போளூர்-பெலாசூர் செல்லும் சாலையில் ரயில்வே கடவுப்பாதை உள்ளது. பெலாசூர் சாலையில் சனிக்கிழமை, பெலாசூர், பாடகம், அலங்காரமங்கலம் என பல்வேறு கிராமங்களுக்கு இரு சக்கர வாகனங்கள், கனரக வாகனங்கள் மற்றும் பாதசாரிகள் தினமும் செல்கின்றனர்.  மேலும் போளூர்-வேலூர், போளூர்-சேத்துப்பட்டு சாலையில் மேம்பாலப் பணி நடைபெற்று வருகிறது. இதனால் சேத்துப்பட்டு பகுதியில் உள்ள கிராமங்களுக்குச் செல்லும் இரு சக்கர வாகனங்கள், பாதசாரிகள் போளூர்-பெலாசூர் சாலையை பயன்படுத்தி வருகின்றனர். இதனால் அந்தச் சாலையில் எப்போதும் போக்குவரத்து நிறைந்த பகுதியாக காணப்படுகிறது. இந்த நிலையில் மன்னார்குடி- திருப்பதி, கன்னியாகுமரி-புருலியா, சென்னை-திருவண்ணாமலை என பல்வேறு வழித்தட ரயில்கள் செல்லும் போது, ரயில்வே கடவுப்பாதை 5 நிமிஷத்துக்கு முன்பு மூடப்படுகிறது.  அந்த நேரத்தில் இரு சக்கர வாகன ஓட்டிகள், பாதசாரிகள் ஆபத்தை உணராமல் வாகனங்களை தண்டவாளத்தில் ஓட்டி கடந்து செல்கின்றனர். திடீரென ரயில் வந்தால் விபத்து ஏற்படலாம். எனவே, ரயில்வே துறை சார்பில் வாகன ஓட்டிகள், பாதசாரிகளுக்கு விழிப்புணர்வு ஏற்படுத்த வேண்டும் என சமூக ஆர்வலர்கள் கோரிக்கை விடுக்கின்றனர்.