திருப்பூர்: ஆன்லைன் மூலம் வாலிபரிடம் மோசடி
திருப்பூர் பெருமாநல்லூர் ரோடு பகுதியைச் சேர்ந்த ஒரு வாலிபருக்கு கடந்த மாதம் 29-ந்தேதி வாட்ஸ்-அப் மூலம் குறுஞ்செய்தி வந்துள்ளது. அந்த குறுஞ்செய்தியில் ஓட்டலுக்கு மதிப்பீடுகளை வழங்கும் பகுதி நேரவேலை என குறிப்பிடப்பட்டிருந்தது. மேலும் இந்த பணிகளைத் தொடர டெலிகிராம் மூலம் குறிப்பிட்ட நபரைத் தொடர்புகொள்ள வேண்டும் என குறிப்பிட்டிருந்தனர். அந்த வாலிபரும் குறிப்பிட்ட டெலிகிராம் கணக்கிற்குச் சென்று அவர்கள் கூறிய ஓட்டல் மதிப்பீடுகளைச் செய்து முடித்தார். அதற்கான கமிஷன் தொகையும் வாலிபரின் வங்கி கணக்கிற்கு வரவு வைக்கப்பட்டது. மேலும் பணம் முதலீடு செய்து இந்த பணிகளைத் தொடர்ந்தால் கூடுதல் லாபம் கிடைக்கும் என அந்த வாலிபருக்கு அறிவுறுத்தியுள்ளனர். இதனை நம்பிய வாலிபரும் ரூ. 5 லட்சத்து 52 ஆயிரத்தை முதலீடு செய்தார். தொடர்ந்து அந்த வாலிபர் செய்த மதிப்பீட்டிற்கான கமிஷனும், முதலீடு செய்த தொகையும் எடுக்க முடியாமல் போனது. இதனைத் தொடர்ந்து தான் ஏமாற்றப்பட்டதை அறிந்த அந்த வாலிபர் ஆன்லைன் மூலம் மாநகர சைபர் கிரைம் போலீசாருக்கு புகார் அளித்தார். புகாரின் பேரில் வழக்குப்பதிவு செய்த போலீசார் விசாரணை மேற்கொண்டு வருகின்றனர்
