தூத்துக்குடி: உப்பு சங்கத்தின் புதிய கட்டிட பணிகள் விரைவில் தொடங்கும்
தூத்துக்குடி தன்பாடு உப்பு மூடை சுமை தொழிலாளர்கள் முன்னேற்ற சங்கத்திற்கு புதிய கட்டிடம் கட்டும் பணி விரைவில் தொடங்கும் என்று மேயர் ஜெகன் பெரியசாமி தெரிவித்தார். தூத்துக்குடி தன்பாடு சங்க கட்டிடத்தினை மேயர் ஜெகன் பெரியசாமி பார்வையிட்டார். பின்னர் அவர் கூறுகையில், "தூத்துக்குடி மாநகரின் அடையாளமும் பிரதான தொழிலுமான உப்பளத் தொழிலில் ஈடுபட்டுள்ள தூத்துக்குடி தன்பாடு உப்பு மூடை சுமை தொழிலாளர்கள் முன்னேற்ற சங்கத்திற்கு புதிய கட்டிடம் கட்டுவதற்காக பார்வையிட்டேன். இந்த சங்கத்தை எனது தந்தையாரும் கலைஞரின் முரட்டு பக்தருமான என். பெரியசாமி, தொழிலாளர் தோழனாக இருந்து வழி நடத்தினார்கள். மேலும் சங்கத்தின் தலைவராக இருக்கும் நான் எனது தந்தையார் நினைவாக ஒரு புதிய கட்டிடத்தை அந்த இடத்தில் கட்டி தருகிறேன் என்றும் வரும் நாட்களில் பணிகள் ஆரம்பமாகும் என்று தெரிவித்தார். ஆய்வின் போது, திமுக பொதுக்குழு உறுப்பினர் கோட்டு ராஜா, சங்கத்தின் பொருளாளர் ஆறுமுக நயினார், சங்கத்தின் நிர்வாகிகள் மற்றும் உறுப்பினர்கள் உடனிருந்தனர்.
