தமிழக காவிரி விவசாயிகள் சங்கம் சார்பில் ஆர்ப்பாட்டம்
வலங்கைமான் கடைத்தெருவில் தமிழக காவிரி விவசாயிகள் சங்கம் சார்பில் பயரி கிருஷ்ணமணி தலைமையில் ஆர்ப்பாட்டம் நடைபெற்றது. செம்மங்குடி ராஜேந்திரன் முன்னிலை வகித்தார். அமராவதி அன்பழகன், அரவத்தூர் ஆனந்த், களத்தூர் ஐயாறு, வைத்தியலிங்கம், தெட்சிணாமூர்த்தி மற்றும் பல விவசாயிகள் கலந்து கொண்டனர். ஆர்ப்காட்டத்தில் 2023 - 24 ஆம் ஆண்டிற்கான காப்பீட்டு இழப்பீட்டிற்கான அரசாணை ரத்து செய்ய நடவடிக்கை எடுக்க கோரியும், மேட்டூர் அணை வறண்டு 2023 ஆகஸ்ட் 7ஆம் தேதியே அணை மூடப்பட்டதால் சம்பா சாகுபடி முற்றிலும் அழிந்த நிலையில் காப்பீட்டிற்கான இழப்பீட்டை நிபந்தனையின்றி 100% வழங்க கோரியும், மாவட்ட ஆட்சியர் தலைமையிலான பேரிடர் மேலாண்மை குழு மழையளவை கணக்கில் கொண்டு மகசூல் இழப்பை மறு ஆய்வு செய்து இழப்பீட்டை நிர்ணயம் செய்ய கோரினர். மேலும், ஆண்டுதோறும் அறுவடை ஆய்வறிக்கையை மாவட்ட பேரிடர் மேலாண்மை குழு ஒப்புதல் பெற்று மகசூல் இழப்பை இறுதி செய்வதை கட்டாயமாக்கிட கோரியும், முந்தைய மூன்று ஆண்டுகளுக்கான தற்போதைய உத்தேச மகசூல் அளவை இரண்டு மடங்காக உயர்த்திட கோரியும், தனியார் காப்பீட்டு நிறுவனங்களை அனுமதிக்காதே என பல்வேறு கோரிக்கைகளை முன்னிறுத்தி ஆர்ப்பாட்டம் நடைபெற்றது.
