சங்ககிரி அருகே இருவேறு விபத்து.. லாரி டிரைவர் உள்பட 2 பேர் பலி
நாமக்கல் மாவட்டம் பரமத்திவேலூர் கவுண்டர் தெருவை சேர்ந்தவர் வடிவேல் (வயது 50), லாரி டிரைவர். இவர் நேற்று லாரி ஸ்பேர் பார்ட்ஸ் வாங்கி வர திருச்செங்கோட்டில் இருந்து பவானி நோக்கி தனது மோட்டார் சைக்கிளில் வந்தார். சேலம்-கோவை தேசிய நெடுஞ்சாலையில் மங்கரங்கம்பாளையம் அருகே வந்த போது, அவருக்கு முன்னால் சென்ற லாரி திடீரென பிரேக் பிடித்துள்ளார். லாரிக்கு பின்னால் வந்த வடிவேலு நிலைதடுமாறியதில் லாரியின் பின்பக்கம் மோட்டார் சைக்கிள் மோதியது. இந்த விபத்தில் படுகாயம் அடைந்த வடிவேலை அக்கம்பக்கத்தினர் மீட்டு சங்ககிரி அரசு ஆஸ்பத்திரிக்கு கொண்டு வரும் வழியிலேயே இறந்து விட்டார். இந்த விபத்து குறித்து சங்ககிரி போலீசார் வழக்குப்பதிவு செய்து விசாரணை நடத்தி வருகின்றனர். மற்றொரு விபத்து சங்ககிரி அருகே வைகுந்தம் அக்ரஹாரம் பகுதியை சேர்ந்தவர் ரவி (55), கூலித்தொழிலாளி. இவர் நேற்று முன்தினம் தனது மொபட்டில் வீட்டுக்கு திரும்பி வந்து கொண்டிருந்தார். வைகுந்தம் சுங்கச்சாவடி அருகே வந்த போது அவருக்கு பின்னால் வந்த லாரி மொபட் மீது எதிர்பாராதவிதமாக மோதியது. இந்த விபத்தில் படுகாயம் அடைந்த ரவியை சங்ககிரி அரசு ஆஸ்பத்திரிக்கு கொண்டு செல்லும் வழியிலேயே பரிதாபமாக இறந்தார். இந்த விபத்து குறித்து சங்ககிரி போலீசார் வழக்குப்பதிவு செய்து விசாரணை நடத்தி வருகின்றனர்.
