தேன்கனிக்கோட்டை: மாடுகள் திருடிய 2 பேர் கைது
கிருஷ்ணகிரி மாவட்டம் தேன்கனிக்கோட்டை அருகேயுள்ள அரசகுப்பம் பகுதியை சேர்ந்தவர் வினோத் (42) தனியார் பள்ளியில் தலைமை ஆசிரியராக உள்ளார். இந்நிலையில் இவர் ஏ.வி.எஸ். லேஅவுட்டில் கொட்டகை அமைக்கப்பட்டு மாடுகளை வளர்த்து வருகிறார். கடந்த மாதம் மாடுகளை கொட்டகையில் கட்டிவிட்டு வீட்டிற்குச் சென்றார். மறுநாள் காலையில் வந்து பார்த்தபோது, 5 மாடுகளை மர்ம நபர்கள் திருடிச் சென்றிருந்தனர். இதுகுறித்த புகாரின் பேரில் தேன்கனிக்கோட்டை போலீசார் வழக்குப்பதிவு செய்து விசாரித்ததில் தேன்கனிக்கோட்டை அடுத்துள்ள கொல்லப்பள்ளியைச் சேர்ந்த மஞ்சுநாதரெட்டி (37), கர்நாடக மாநிலம், கனகபுரா அடுத்த கட்டிகுண்டா பகுதியைச் சேர்ந்த ரவிச்சந்திரன் (24) ஆகியோர் மாடுகளை திருடியது தெரியவந்தது. இதையடுத்து 2 பேரை நேற்றுமுன்தினம் போலீசார் கைது செய்தனர்.
