ஒசூரில் வக்கீல் வெட்டப்பட்ட விவகாரம் காஞ்சியில் ஆர்ப்பாட்டம்
கிருஷ்ணகிரி மாவட்டம், ஒசூர் நீதிமன்ற வளாகத்தில் கண்ணன் என்ற வழக்கறிஞர், நேற்று முன்தினம் வெட்டப்பட்டார். நீதிமன்றம் அருகிலேயே வழக்கறிஞர் வெட்டி கொலை முயற்சிக்கு ஆளாக்கப்பட்ட சம்பவம் தமிழகம் முழுதும் பரபரப்பை ஏற்படுத்தியது. இதனால், தமிழகம் முழுதும் நீதிமன்ற புறக்கணிப்பு செய்து, வழக்கறிஞர்கள் ஆர்ப்பாட்டம் நடத்தினர். காஞ்சிபுரத்திலும் நீதிமன்ற புறக்கணிப்பு செய்து, அனைத்து வழக்கறிஞர்கள் சங்கத்தைச் சேர்ந்த வழக்கறிஞர்கள் நேற்று ஆர்ப்பாட்டம் செய்தனர். காஞ்சிபுரம் காமராஜர் சாலையில் நின்று, ஆர்ப்பாட்டம் நடத்தினர். தமிழகத்தில் வழக்கறிஞர்கள் தொடர்ந்து தாக்குதல்களுக்கு ஆளாக்கப்படுவதாக குற்றஞ்சாட்டினர். ஒசூரில் வழக்கறிஞர் வெட்டப்பட்ட சம்பவத்தில் நடவடிக்கை எடுக்க வேண்டும் எனவும், அந்த சம்பவத்தை கண்டித்தும், காஞ்சிபுரம் வழக்கறிஞர்கள் முழக்கங்கள் எழுப்பினர்.
