கோவை: கஞ்சா விற்ற 4 பேர் கைது; பைக், செல்போன் பறிமுதல்
கோவை வெறைட்டிஹால் ரோடு போலீசார் நேற்று(நவம்பர் 9) ரோந்து பணி சென்றனர். அப்போது ராஜ வீதியில் உள்ள கார் பாக்கிங்கில் 2 பேர் நின்றிருந்தனர். சந்தேகத்தின்பேரில், போலீசார் பிடித்து விசாரித்தனர். அதில், இருவரும் கஞ்சா விற்றது தெரியவந்தது. இதனையடுத்து போலீசார் கஞ்சா விற்ற கோவை உப்பாரா தெருவை சேர்ந்த பால கிருஷ்ணன்(42), பொன்னுசாமி லே-அவுட்டை சேர்ந்த தனசேகர்(34) ஆகிய இருவரை கைது செய்தனர். அவர்களிடம் இருந்து அரை கிலோ கஞ்சா, 3 செல்போன் மற்றும் ஒரு பைக் பறிமுதல் செய்யப்பட்டது. இதேபோல், துடியலூரில் கஞ்சா விற்ற ராக்கிபாளையம் பிரிவை சேர்ந்த பாலாஜி நகரை சேர்ந்த முகமத் ஜாசீம்(18) மற்றும் கார்த்திக் ராஜ்(27) ஆகிய இருவரை கைது செய்தனர். இருவரிடம் இருந்தும் 110 கிராம் கஞ்சா, 2 செல்போன்கள் பறிமுதல் செய்யப்பட்டது.
