தஞ்சாவூர்: இளைஞர் நீதிக்குழுமத்திற்கு சமூகப்பணி உறுப்பினர்கள் நியமனம்
தஞ்சாவூர் மாவட்டத்தில் அமைக்கப்பட்டுள்ள இளைஞர் நீதிக்குழுமத்திற்கு சமூகப்பணி உறுப்பினர்கள் நியமிக்கப்படுவதற்காக தகுதி வாய்ந்த நபர்களிடமிருந்து விண்ணப்பங்கள் வரவேற்கப்படுகின்றன. இளைஞர் நீதிக் குழுமத்திற்கு ஒரு பெண் உட்பட இரண்டு சமூகப்பணி உறுப்பினர்கள் அரசால் மதிப்பூதிய அடிப்படையில் நியமிக்கப்பட உள்ளனர் மற்றும் இப்பதவி அரசுப் பணி அல்ல. விண்ணப்பதாரர் குழந்தைகள் தொடர்பான உடல் நலம், கல்வி அல்லது குழந்தைகளுக்கான நலப்பணிகளில் குறைந்தது 7 ஆண்டுகள் ஈடுபாடு கொண்டவராக இருத்தல் வேண்டும். (அல்லது) குழந்தை உளவியல், மனநல மருத்துவம், சமூகவியல் அல்லது சட்டம் ஆகியவற்றில் ஏதேனும் பட்டம் பெற்று தொழில் புரிபவராக இருத்தல் வேண்டும். மேலும், விண்ணப்பதாரர்கள் 35 வயதுக்கு குறையாதவராகவும், 65 வயதைப் பூர்த்தி செய்யாதவராகவும் இருத்தல் வேண்டும். இதற்கான விண்ணப்ப படிவத்தை மாவட்ட குழந்தைகள் பாதுகாப்பு அலகு, சிறுவர்களுக்கான அரசினர் குழந்தைகள் இல்லம் வளாகம், வ.உ.சி. நகர், தஞ்சாவூர்-613 007 என்ற முகவரியிலும் அல்லது துறைச் சார்ந்த இணையதள முகவரியிலிருந்து (https://dsdcpimms.tn.gov.in), thanjavur.nic.in விண்ணப்பதாரர் பதிவிறக்கம் செய்து கொள்ளலாம். 07.03.2025 (வெள்ளிக்கிழமை) மாலை 5 மணிக்குள் கிடைக்கப்பெறுமாறு விண்ணப்பிக்கலாம் என ஆட்சியர் பா. பிரியங்கா பங்கஜம் தெரிவித்துள்ளார்.
