நரசீபுரம்: மேற்கூரை உடைத்து பணம், செல்போன்கள் திருட்டு
கோவை மாவட்டம் தொண்டாமுத்தூர் அருகே உள்ள குளத்துப்பாளையம், நரசீபுரம் மெயின் ரோட்டில் சுமார் 10-க்கும் மேற்பட்ட கடைகள் உள்ளன. இவற்றில் மொபைல்போன் சர்வீஸ் கடை, சொட்டு நீர் பாசன குழாய் விற்பனை அலுவலகம், மரக்கடை ஆகிய மூன்று கடைகளின் மேற்கூரைகள் சிமெண்ட் சீட்டால் அமைக்கப்பட்டுள்ளன. நேற்று முன்தினம் (நவ.,6) காலை வழக்கம் போல கடைகளை திறந்த உரிமையாளர்கள், மூன்று கடைகளின் மேற்கூரைகளும் உடைக்கப்பட்டிருந்ததைக் கண்டு அதிர்ச்சியடைந்தனர். மேலும் விசாரணையில், இரண்டு கடைகளில் இருந்த 42,000 ரூபாய் பணமும், மொபைல்போன் கடையில் இருந்த 4 மொபைல்போன்களும் திருடப்பட்டிருப்பது தெரியவந்தது. இச்சம்பவம் குறித்து தகவல் அறிந்த தொண்டாமுத்தூர் போலீசார் சம்பவ இடத்திற்கு விரைந்து வந்தனர். அப்பகுதியில் உள்ள சி.சி.டி.வி. கேமரா பதிவுகளை ஆய்வு செய்து, விரிவான விசாரணை நடத்தி வருகின்றனர். திருட்டில் ஈடுபட்ட மர்மநபர்களை தேடும் பணியிலும் போலீசார் ஈடுபட்டுள்ளனர். இந்த சம்பவம் அப்பகுதி வியாபாரிகள் மற்றும் பொதுமக்களிடையே அச்சத்தை ஏற்படுத்தியுள்ளது. இரவு நேர பாதுகாப்பை அதிகரிக்க வேண்டும் என்றும், குற்றவாளிகளை விரைவில் கைது செய்ய வேண்டும் என்றும் அப்பகுதி மக்கள் கோரிக்கை விடுத்துள்ளனர்.
