பொள்ளாச்சி: சந்தன மரம் வெட்டிக் கடத்திய 3 பேர் கைது
பொள்ளாச்சி அருகே உள்ள ஆனைமலை புலிகள் காப்பகத்தில் சந்தன மரங்களை வெட்டி கடத்த முயன்ற மூன்று நபர்கள் வனத்துறையினரால் கைது செய்யப்பட்டனர். மேற்கு தொடர்ச்சி மலைப்பகுதியில் அமைந்துள்ள ஆனைமலை புலிகள் காப்பகத்தின் பொள்ளாச்சி வன சரகத்திற்கு உட்பட்ட கடுக்காய் மரத்திட்டு பகுதியில் பொள்ளாச்சி வன சரகர் மற்றும் களப்பணியாளர்கள் கள ஆய்வுப் பணியில் ஈடுபட்டிருந்தனர். அப்போது, அடர்ந்த வனப்பகுதிக்குள் மூன்று மர்ம நபர்கள் சுற்றித்திரிவதைக் கண்டனர். வனத்துறையினரைக் கண்டதும் தப்பிக்க முயன்ற அந்த மூவரை களப்பணியாளர்கள் பிடித்தனர். அவர்களிடம் இருந்த கவரை சோதனையிட்டபோது, அதில் மூன்று சந்தன மரத்துண்டுகள் இருப்பது கண்டுபிடிக்கப்பட்டது. பிடிபட்டவர்களிடம் நடத்தப்பட்ட விசாரணையில், அவர்கள் கள்ளக்குறிச்சி பகுதியைச் சேர்ந்த அண்ணாமலை, அசோக், கணேசன் ஆகியோர் என்பது தெரிய வந்தது. இவர்கள் அடர்ந்த வனப்பகுதிக்குள் சென்று சந்தன மரங்களை வெட்டி கடத்தி வந்தது தெரியவந்தது. வனத்துறையினர் அவர்களிடமிருந்த மூன்று சந்தன மரத்துண்டுகளை பறிமுதல் செய்தனர். மேலும், மூவர் மீதும் வழக்குப் பதிவு செய்து பொள்ளாச்சி நீதிமன்றத்தில் ஆஜர்படுத்தி இன்று(அக்.30) பொள்ளாச்சி கிளை சிறையில் அடைத்தனர்.
