நாகை: திறன் பயிற்சிக்கு பதிவு செய்யும் காலக்கெடு நீட்டிப்பு
நாகப்பட்டினம் மாவட்டத்தில் தமிழ்நாடு திறன் மேம்பாட்டுக் கழகத்தின் சார்பாக முன்னணி நிறுவனங்களில் ஊக்கத்தொகையுடன் கூடிய வேலை வாய்ப்பு பயிற்சி அளிக்கும் பிரதம மந்திரி தேசிய இன்டர்ன்ஷிப் திட்டத்தில் திறன் பயிற்சிக்கு பதிவு செய்யும் காலம் 15.04.2025 வரை நீட்டிப்பு செய்யப்பட்டுள்ளது என மாவட்ட ஆட்சித்தலைவர் ப. ஆகாஷ், முன்னணி தெரிவித்துள்ளார். இது தொடர்பாக அவர் வெளியிட்டுள்ள செய்தி குறிப்பில் ஊக்கத்தொகையுடன் கூடிய வேலை வாய்ப்பு பயிற்சி அளிக்கும் பிரதம மந்திரி தேசிய இன்டர்ன்ஷிப் திட்டத்தில் பதிவு செய்வதற்கான காலவரம்பு தற்போது 15.04.2025 வரை நீட்டிக்கப்பட்டுள்ளது. இதில் படித்த இளைஞர்களுக்கு இந்திய அளவில் 500 முன்னணி நிறுவனங்களில் 12 மாதம் வேலைவாய்ப்பு பயிற்சி (இன்டர்ன்ஷிப்) வழங்க முடிவு செய்யப்பட்டுள்ளது. 5 ஆண்டுகளில் ஒரு கோடி இளைஞர்களுக்கு இன்டர்ன்ஷிப் பயிற்சி வழங்கப்படவுள்ளது. இப்பயிற்சிக்கு 21 வயது முதல் 24 வயது வரை உள்ளவர்கள் மட்டுமே விண்ணப்பிக்கலாம். குடும்ப வருமானம் ஆண்டுக்கு 8 இலட்சம் ரூபாய்க்கு மிகாமல் இருக்க வேண்டும். 10 ஆம் வகுப்பு, 12 ஆம் வகுப்பு, டிப்ளமோ, பி.இ., பி.ஏ., பி.எஸ்.சி., பி.காம் மற்றும் ஐ.டி.ஐ கல்வித் தகுதி உள்ளவர்கள் விண்ணப்பிக்கலாம் என குறிப்பிட்டுள்ளார்.
