சிவகங்கை: டாஸ்மாக் சப்ளையரிடம் பணம் பறித்த வாலிபர் கைது
சிவகங்கை மாவட்டம் தேவகோட்டையை சேர்ந்தவர் மகாலிங்கம்(28). இவர் ராமநாதபுரம் 80 அடி ரோட்டில் உள்ள டாஸ்மாக்கில் சப்ளையராக வேலை பார்த்து வருகிறார். நேற்று மகாலிங்கம் தனது நண்பர் ஒருவருடன் ராமநாதபுரம் வள்ளியம்மாள் தெருவில் நடந்து சென்று கொண்டிருந்தார். அப்போது அவரை வழிமறித்த வாலிபர் ஒருவர் பணம் கேட்டார். அவர் கொடுக்க மறுத்ததால் கத்தியை காட்டி மிரட்டி அவரிடம் இருந்த ரூ. 1250 ஐ பறித்தார். இதனால் அதிர்ச்சியடைந்த மகாலிங்கம் கூச்சல் போட்டார். சத்தம் கேட்டு ஓடி வந்த அந்த வழியாக சென்றவர்கள் பணம் பறித்த அந்த வாலிபரை மடக்கி பிடிக்க முயன்றனர். ஆனால் அவர்களையும் மிரட்டி விட்டு அந்த வாலிபர் அங்கிருந்து தப்பி சென்றார். இது குறித்து மகாலிங்கம் ராமநாதபுரம் போலீஸ் நிலையத்தில் புகார் அளித்தார். புகாரின்பேரில், போலீசார் வழக்குப்பதிவு செய்து விசாரித்தனர். அதில், பணம் பறித்தது, திருப்பூர் வேலம்பாளையத்தை சேர்ந்த ஆகாஸ்(21) என்பது தெரியவந்தது. போலீசார் அவரை கைது செய்தனர்.
