ஜலகண்டாபுரம் ரூ. 3 லட்சத்துக்கு கொப்பரை தேங்காய் ஏலம்
சேலம் மாவட்டம் மேச்சேரி ஒழுங்கு முறை விற்பனைக் கூடத்தின் உப கிளை ஜலகண்டாபுரம் நரியம்பட்டியில் இயங்கி வருகிறது. இங்கு வாரந்தோறும் திங்கட்கிழமைகளில் ஏலம் நடைபெறும். இங்கு கொப்பரை தேங்காய் ஏலம் எடுப்பதற்காக மேட்டூர், கொளத்தூர், மேச்சேரி, நங்கவள்ளி, ஓமலூர், பூலாம்பட்டி, சிங்கம்பேட்டை, அம்மாபேட்டை, வனவாசி, பெருந்துறை, நரியம்பட்டி, அரியாம்பட்டி, சின்னானூர், வாத்திப்பட்டி, ஊத்துக்குளி, காங்கயம், முத்தூர், விஜயமங்கலம், வாழப்பாடி, அந்தியூர், தர்மபுரி, பென்னாகரம் மற்றும் சுற்று வட்டார பகுதிகளில் இருந்து விவசாயிகள் கொப்பரை தேங்காயை ஏலத்திற்கு கொண்டு வந்தனர். கடந்த வாரம் 20 மூட்டைகள் ரூ. 78 ஆயிரத்துக்கு ஏலம் போனது. இந்த வாரத்தில் கொப்பரை தேங்காய் வரத்து அதிகரித்தது. 50 மூட்டை கொப்பரை தேங்காய் சுமார் ரூ. 3 லட்சத்துக்கு ஏலம் போனது. இதில் முதல் தரம் குவிண்டால் ஒன்றுக்கு ரூ. 12 ஆயிரத்து 599 முதல் ரூ. 14 ஆயிரத்து 568 வரை விற்பனையானது. இரண்டாம் தரம் ரூ. 6 ஆயிரத்து 699 முதல் ரூ. 12 ஆயிரத்து 480 வரை விற்பனையானது.
