பூம்புகார் - Poombhukar

நாகை மாவட்டம் அக்கரைபேட்டையில் உள்ள பழமை வாய்ந்த முத்து மாரியம்மன் கோவில் அஷ்டபந்தன மகா கும்பாபிஷேக விழா இன்று காலை வெகு விமர்சையாக நடைபெறுகிறது. 15 ஆண்டுகளுக்குப் பின் நடைபெறும் கும்பாபிஷேக விழாவை முன்னிட்டு, கீச்சாங்குப்பம் மகா காளியம்மன் கோவிலில் இருந்து அக்கரைப்பேட்டை முத்து மாரியம்மன் கோவிலுக்கு இன்று சீர்வரிசை கொண்டு செல்லும் நிகழ்ச்சி நடைபெற்றது. அப்போது மேளதாளம் முழங்க காளியம்மன் கோவிலில் இருந்து புறப்பட்ட ஊர்வலத்தில் மஞ்சள் குங்குமம் மலர் தேங்காய் பழம் பட்டாடைகள் மற்றும் தங்க நகை அடங்கிய தாம்பூலங்களை மீனவர்கள் மற்றும் மீனவ பெண்கள் சீர்வரிசையாக முத்து மாரியம்மன் ஆலயத்திற்கு ஊர்வலமாக எடுத்து வந்தனர். சீர்வரிசை எடுத்து வந்த மீனவர்களுக்கு, அக்கரைப்பேட்டை கிராம மக்கள் வரவேற்பு அளித்தனர். அதனைத் தொடர்ந்து மீனவர்கள் கொண்டு வந்த சீர்வரிசை பெற்றுக் கொண்ட ஆலய நிர்வாகிகள் அம்மனுக்கு சிறப்பு அலங்காரம் செய்து வைத்தனர். பின்னர் பாரம்பரிய வழக்கப்படி தலைமை கிராம அக்கரைப்பேட்டைக்கு சீர்வரிசையை கொண்டு வந்த கீச்சாங்குப்பம் கிராம மீனவர்கள், சிறப்பு அலங்காரத்தில் எழுந்தருளிய அம்பாளை வழிபட்டு சுவாமி தரிசனம் செய்தனர்.