திருமங்கலம்: லஞ்சம் வாங்கிய சார் பதிவாளர் உள்பட இருவர் கைது
மதுரை மாவட்டம் திருமங்கலம் அருகே கிழவனேரியை சேர்ந்த ஆனந்தராஜ் என்பவருக்கு சொந்தமான 3 ஏக்கர் 18 சென்ட் இடத்தை செந்தில்குமார் கிரையம் செய்வதாக திருமங்கலம் சார்பதிவாளர் அலுவலகத்தை அணுகியுள்ளார். ஜனவரி 24ஆம் தேதி பத்திரப்பதிவு செய்வதற்கு வந்துள்ளார். அப்போது முந்தைய நிலத்தின் உரிமையாளர் ஆனந்தராஜ் பத்திரம் காணவில்லை என தேனி மாவட்டம் தென்கரை காவல் நிலைய ஆய்வாளரிடம் சான்று வாங்கியது உண்மைதானா என விசாரித்தது, பின்பு பதிவு செய்வதாக சார்பதிவாளர் பாண்டியராஜன் தெரிவித்துள்ளார். பிப்ரவரி 14-ஆம் தேதி உண்மைத்தன்மை அறிந்து விசாரணை முடித்துள்ளார். பின்னர் செந்தில்குமார் 21ஆம் தேதி பத்திரம் செய்ய வந்துள்ளார். அவரிடம் ரூபாய் ஒரு லட்சம் திரும்பவும் கேட்டுள்ளார். பின்னர் பேரம் பேசி ரூபாய் 70 ஆயிரம் தருவதாக ஒப்புக்கொண்டார். நேற்று (பிப். 24) செந்தில்குமார் சார்பதிவாளர் அலுவலகத்திற்கு வந்துள்ளார். அவரிடம் புரோக்கர் பாலமணிகண்டனிடம் ரூபாய் 70,000 வங்கி கணக்கு மூலம் அனுப்பியுள்ளார். அதே நேரத்தில் செந்தில்குமார் பெயருக்கு பத்திரப்பதிவு முடிந்து விட்டது. இது தொடர்பாக லஞ்ச ஒழிப்புப் போலீசார் பாலமணிகண்டனை பிடித்து விசாரணை செய்த போது, சார்பதிவாளர் பாண்டியராஜன் கேட்டதால்தான் வாங்கியுள்ளதாக வாக்குமூலம் அளித்தார். லஞ்ச ஒழிப்புப் போலீசார் பாண்டியராஜன் மற்றும் பாலமணிகண்டனை கைது செய்து விசாரிக்கின்றனர்.
