ஈரோடு வ. உ. சி மார்க்கெட்டில் காய்கறிகள் விலை கடும் வீழ்ச்சி
ஈரோடு வ.உ.சி காய்கறி மார்க்கெட்டில் 700-க்கும் மேற்பட்ட காய்கறி கடைகள் செயல்பட்டு வருகிறது. இங்கு தாளவாடி, ராசிபுரம், திருப்பூர், ஒட்டன்சத்திரம், ஓசூர், பெங்களூர் உட்பட பல்வேறு பகுதிகளிலிருந்து காய்கறிகள் விற்பனைக்கு கொண்டுவரப்படுகிறது. கடந்த சில நாட்களாக காய்கறிகள் விளைச்சல் பாதிக்கப்பட்டு வரத்து குறைந்ததால் பல்வேறு காய்கறிகள் விலை உயர்ந்து காணப்பட்டது. இந்நிலையில் இன்று காலை வ.உ.சி காய்கறி மார்க்கெட்டிற்கு தாளவாடி, ராசிபுரம், ஒட்டன்சத்திரம், ஓசூர் போன்ற பகுதிகளிலிருந்து வழக்கத்தை விட கூடுதலாக காய்கறிகள் விற்பனைக்கு கொண்டு வரப்பட்டிருந்தது. தற்போது பல்வேறு இடங்களில் காய்கறிகள் விளைச்சல் அமோகமாக இருப்பதால் வழக்கத்தை விட காய்கறிகள் அதிக அளவில் விற்பனைக்கு கொண்டுவரப்பட்டிருந்தது. வரத்து அதிகரிப்பு எதிரொலியாக கடந்த வாரத்தை விட இன்று பல காய்கறிகளின் விலை கடும் வீழ்ச்சி அடைந்துள்ளது. குறிப்பாக கடந்த சில நாட்களாக கிலோ 100 ரூபாய்க்கு விற்கப்பட்டு வந்த பட்டாணி அவரை அதிரடியாக விலை குறைந்து ஒரு கிலோ ரூ.40-க்கு விற்பனையானது. இதைப்போல் கருப்பு அவரையும் ஒரு கிலோ இன்று ரூ.50-க்கு விற்பனையானது. இதைப்போல் கிலோ 150-க்கு விற்கப்பட்ட முருங்கைக்காய் இன்று ஒரு கிலோ ரூ.100-க்கு விற்பனையானது. இதைப்போல் பல்வேறு காய்கள் விலையும் இன்று அதிரடியாக குறைந்துள்ளது.
