கஞ்சா வைத்திருந்த 2 பேர் கைது
அரசால் தடை செய்யப்பட்ட போதைப் பொருள்கள் உபயோகத்தை தடுக்க மாவட்ட போலீசார் தீவிர நடவடிக்கை மேற்கொண்டு வருகின்றனர். அதன் அடிப்படையில் கோபி போலீசார் பெரியார் திடல் பின்புறம் உள்ள ஏரி மாரியம்மன் கோயில் அருகே கண்காணிப்பில் ஈடுபட்டிருந்தனர். அப்போது, சந்தேகத்துக்கிடமாக நடமாடிய நபரை பிடித்து விசாரித்ததில் அவர், ஸ்லேட்டர் ஹவுஸ் வீதியைச் சேர்ந்த மாதேஸ்வரன் (47) என்பதும், சமையல் தொழிலாளியான அவர், வேலைக்காக மேட்டுப்பாளையம் சென்றபோது அங்கிருந்த ஒரு நபரிடம் இருந்து 50 கிராம் கஞ்சாவை வாங்கி வந்ததும் தெரியவந்தது. இதையடுத்து போலீசார் அவர் மீது வழக்கு பதிவு செய்து கைது செய்தனர். மேலும், அவரிடம் இருந்து ரூ. 500 மதிப்பிலான 50 கிராம் கஞ்சாவையும் பறிமுதல் செய்தனர். இதே போல, ஈரோடு சூரம்பட்டி போலீசார், சென்னிமலை ரோடு, கூட் செட் அருகில் கஞ்சா விற்பனையில் ஈடுபட்டிருந்த அதே பகுதியைச் சேர்ந்த விக்னேஸ்வரன் (28) என்பவர் மீதும் வழக்குப்பதிவு செய்து கைது செய்தனர். அவரிடம் இருந்து ஒரு கிலோ கஞ்சா பறிமுதல் செய்யப்பட்டது.
